نقاش حاااااااااااااار جدا............

[ولد & السويدي]

السلام عليكم ورحمه الله وبركاته


حبيت اتناقش معاكم عن موضوع محيرني

نبدأ

ليش لما اييك واحد هندي ترمسه (تعال بكره انا بيعطي فلوس ما انته)
ليش لما اييك الانجليزي يكلمك تكلمه بالانجليزي ..تبغي الناس يقولون انك تعرف انجليزي يعني
الموضوع بالمختصر
الاجانب لما ايون بلادنا نحن نحاول نكلمهم بلغتهم لو مانعرف---احنا مش مجبورين نتكلم لغتهم لو نعرفها لكن نستخدمها بوقت العمل والسفر فقط

لأن انت اذا رحت دوله اجنبيه هل بيكلمونك عربي(على قص رقبتي)
اخوي ساير بلاد اجنبيه بدون ذكر الاسامي ويعرف واحد
قال له احنا نعرف عربي بس مانكلمكم بالعربيه لأنكم انتو يايين بلادنا وانتو مجبورين تتكلمون لغتنا ولو شو يصير مانكلمكم عربي
لا تقولون عصر التطور وما ادري شو قولو احنا نبي نقول للناس احنا نعرف نتكلم انجليزي
ومايحتاي نزيد في لغتنا العاميه بعض الكلمات الانجليزيه وخاصه البنات هاليومين
قامو نص كلامهم انجليزي ليش ناقصنها شي لهجتنا ؟:1577_1186768770:

شفتو كيف

احكمو بأنفسكم

[غـرشوبـه]

احم

اول باركن :yaw:


موضوعك بصراحه يستاهل النفاش

عني انا وبوجهة نظري

كلامك صدق

يعني الاجانب او الوافدين يوم اييون بلادنا

نكرمهم وما نقصر في حقهم

ابد

لكن روحوا شوفوا حالنا لو رحنا سياحه بلاد ثانيه

والله ع اتفه الاسباب يسوون لنا مشاكل

يعني ع الاقل يعاملونا باسلوب حلو

ماشي

والله قهر بس يبالنا نسوي شرات ما يسون لنا على اساس يحسون

عني انا ارمس عن الفئه الي انت حددتها

لكن في ناس يتعلمون عربي بس على اساس يرمسون ويانا

ويحبون يتعلمون عاداتنا وتقاليدنا

ع العموم قلت لك وجهة نظري

والسموحه اذا قلت كلمه غلط

[عڇڙٺ ٱڹڛٱڪ̽]

موضـًــوؤع جًـدا رـائع .َ
يستــأأهـل النٌٌـٌقـأأش .! :oio:

[[ هــًًــًي والله وش هالأجـأنــب خلني اشوف اجنـبيه طايـفه صـوبــي كي والله لأرمـسه ع ـربـــًي تقلع عـينها فهمـت ولا مافهمـًـت !.

عـيل جـّذه يـسوبنـأـأ .! >> يعنـي يعرفون ع ـًربـًـًي . !. بس لأن داخلين دوله اجنبيه ونحن مامجـبوريـًـن نخبص لغتهمـ المخبصه هـًـأـأي .! [ والله لأعـامـلهمـ ـِـشرات مايعـأمــلونـًـأ .!

والله لأ اــسلوب ٍ. ! ولأ شـــًي .ٍ [ ونح ـًن وحـلينـأـأ مـقصـه !. ]]

خـلنــي اشوف .ٍ اجنــبي وان احد سألني وت وما وت < بقــوله هـأكه روح هناك ! ابويه ..ٍ

لعـبو بأعـصــأـأــبي .! :212: . [[ هـاكه ماـأـزين .! ]]

وهالبنـأـات هاليومـين ع قولتكًـ صدقك .! مادري وش يأـأهن ّ ! < خـربو لغـتنا ,ٍ كي وش فيكًـن ناقصــين !. كل وحده تعدل الرمـًـسه ابويه .! رمٍـستنا اللغه العـربـًـيه !. [ لغـه الدين .!


محـًـد يــروح ًـ يخـبصها او يغــيرهـأـأ .!


والسمـٍـؤؤحـًه .^

[المزروعي.....]

هلا احمد مشكور على الموضوع وضحكتني لما قلت في بنات يتكلمون نص عربي ونص انجليزي...
المهم تعرف شو اللي اكتشفته
اني اذا ما اعرف اتكلم انجليزي احس اني جاهل وفعلا الاجاني مايحسون بالجهل
انت تعرف انه في المانيا مايتكلمون انجليزي يتكلمون بس الماني والقهر لو داش تشتري عنه شي وبتربحه والله مايطيع يتكلم انجليزي انا ما اعتبرهم ودفاشه لا بالعكس هاذيل عندهم انتماء للغتهم
واحنا اكثرنا مايعرف يتكلم فصحى فالحين بس انقول خيبه وشفيك علاموك انت خبيل ويش
ههههه
خلها على الله ي احمد
كلوا نفرات سوي كلام انجليزي

[ولد & السويدي]

هلا احمد مشكور على الموضوع وضحكتني لما قلت في بنات يتكلمون نص عربي ونص انجليزي...
المهم تعرف شو اللي اكتشفته
اني اذا ما اعرف اتكلم انجليزي احس اني جاهل وفعلا الاجاني مايحسون بالجهل
انت تعرف انه في المانيا مايتكلمون انجليزي يتكلمون بس الماني والقهر لو داش تشتري عنه شي وبتربحه والله مايطيع يتكلم انجليزي انا ما اعتبرهم ودفاشه لا بالعكس هاذيل عندهم انتماء للغتهم
واحنا اكثرنا مايعرف يتكلم فصحى فالحين بس انقول خيبه وشفيك علاموك انت خبيل ويش
ههههه
خلها على الله ي احمد
كلوا نفرات سوي كلام انجليزي

هلا المزروعي

ماقلنا الواحد مايتعلم انجليزي

بالعكس احنا نشجعه يتعلم كل اللغات بعد لكن يستخدم هاللغات اذا تطلب منه عمله او سافر للخارج

اما اللي ايون عندنا لو تعرف لاتتكلم انجليزي هم مجبورين يتكلمون عربي عيل ليش يجبرونا نتكلم لغتهم في بلدانهم صح والا ؟


تسلم المزروعي كلامك عسل

[رعشة هدب]

السلام عليكم ورحمة الله صج موضوع يستاهل النقاش
يعني نحن نسير بلادهم لاتقدير ولا احترام ابدا
وفي مره مسافرين بلاد اجنيه بدون ذكر اسم طبعا
اليهال عندنا مريض صج صج ورحنا المستشفى مارضي يرمسونا حتى انجليزي
مصرين انرمسهم لغتهم والياهل تعبان حيل
ويالله يالله فهمنا منهم شو السالفه عسب يعالجون الولد
وهاي نحن في بلادنا نحطيهم على روسنا حشى والله اللازم نلقى حل للموضوع

[عجيد الريوم]

انا الصراحه مع اخوي ولد السويدي وهل ظاهره وااايد منتشره عندنا نحن عيال زاايد وجان زين نقدر نقضي عليهـ...

تسلم عالموضوع الغاوي ونتريا يديدكـ ^^

[k.k]

يا أخوي في فرق كبير بينا و بين البلدان الثانية ... على سبيل المثال عدد المواطنين في الدولة 10 % من أجمالي السكان ...... :m_mosala7:
فـ اذا اعتبرنا أن هالـ 10%:m_mosala7: انطلع منهم 5%:d7aim: مستعربين (يعني مش اللغة العربية هي لغتهم الأصلية:shompe:)...... و 5%:bo_mher: منهم من أهل الامارات الأصليين و هم من البدو و الحير و من سكان السواحل الشرقية ......

فـ ما أعتقد أن هالعدد القليل من المواطنين قادرين أنهم يتفاهمون مع الأجانب بالعربي ..... :bad: ... لذلك أعتقد أن نحن(المواطنين) الوافدين و هم(الوافدين) أهل اللبلاد.... :eh_s(6):


تسلم على الطرح ..... :bt:

[رقية]

ايوا يتبهااا ع العوووووق


حتى اتعرف بفرنسااا والمانيا وااايد يعتزووون بلغتهم وما يدانون حد يرمس انجليزيزي



والله السبب الخقه اونه هاي اتعرف وما دري شو :eh_s(1):



عاد الحين بذمتك يوم تسمع حد ي يرمس انجليزي شو يطرى ع بالك



انه ها ولد عز ودراس برع وها اسوالف


واتلاقيه من الصوب الثااني حتى ثانويه ما عنده:eh_s(1):



بس يبالنا نركز ع هالشئ


يعني عندك دول برع تعتز بهالشئ :eh_s(1):




ثاانكس

[ريمـ.ـ.ـآني]

أولآ

أحمد الصرآحه هالموضوع مـآ بتلقـآله حل

أنـآ بخبرك ليـش
الحين بلآدنـآ الموآطنين فيهـآ يمكن 25% أو أقل حتى
يعنــي معظمهــآآ وآآفدين
وحتى لو وآآفدين ترآآهم مسلمين وإذآآ هب مسلمين
أكييد يرمسوون عربي وبصرآحه عن نفسي أرمسهم
رمستنـآ العـآديه مب إمـآرآتي منقع هــآآع
وإذآ ع الأجــآآنب كيف تبونهم يرمسون عربي إذآآ مـآ تعلمو..؟
يعني بالذمه هالشي إذآ بتسوونه ومــآآ بترمسونهم عربي
كيــف بيتفـآآهمون ويـآكم والسيـآح الأجــآآنب أنـآ لآآحظت إن دولتنـآ وآآيد تهتم فييهم
وخــآآصه بالدبي
وسمعت إن في دول أجنبيه لو شو سويت ويـآآهم مـآ بيرمسونك إنجليزي
عندهم مترجمين في كـل مكــآآن بالمستشفيــآآت والأسوآآق أي مكـآن تتوقعه في نـآس ترمس عربي تبغي تتفـآهم ويــآآهم بييبولكـ مترجم

وأأنــآآ أتمنى الصرآآحه هالنظـآم يتبعونه في مستشفيـآتنـآ بالدوله
ههههههه المزروعي كلآمك صحيح أخوي بس تعرف ليـش الحين قـآآمو يرمسون
خبيييل ويييش ولوييش وحق وييش هــآآع
يقولك الحين قـآمو أهـآلي كل إمـآره يعيبون ع غيرهم
فعندك الحيير هني بالفجيره قوم وييش ولوييش هــآآع موآطنين من إمـآرآت غير الفجيره
يعلقوون عليهم إن خلآآآص هل الفجيره كلهم جي حيير وهــآآي رمستهم
وهالشي مش مقبوول الصرآحه
أدريي وآآيد أتفلسف هــآآع
المووهيم تســلم ع الموضوع إلي يستــآآهل النقـآآش الصرآحه
وأتمنى إني مــآآ طولت عليــكم هع:yaw:

[● شَـــآمــخْ ●]

من أهمل لغته .. اهمله العالم ...)



لي عوده ...)




السلام عليكم و رحمة الله و بركااااته ...)

امممممم ....)

من أهمل لغته .. اهمله العالم ...)

هالمقووولة صحيحة 1000% ... مب بس بيهمله العالم من ناحية اللغة .. لكن في كل النواحي ...)

اول شي تعال للتعداد السكاني .. اعتقد آخر مرة كان عدد السكان .. 5 ملايين على ما اعتقد .. و عدد المواطنين 900 الف .. انت لو تطلع نسبة المواطنين .. بتحصلها قليلة جداً بالنسبة للوافدين ... يعني انا أأيد .. k.k ...)

و يمكن نص المواطنين مب عرب من الأسااس ... العرب في الإمارات هم البدو و الحير .. البدو في المناطق الثانية .. و اغلب الحير في الساحل الشرقي ...)

صح انه النصف الثاني مب عرب .. لكن يرمسوا عربي .. لكن بين بعضهم يرمسوا لغة ثانية .. الحين هم بين بعضهم يرمسوا غير .. كيف بيرمسوا الوافدين عربي ..)

الشعب السعودي 90% منه عرب .. و 10% منهم بقايا افريقيا ... انزين .. لكن لو تروح السعودية .. والله ما تفرق بين السعودي و الهندي .. من نااحية اللهجة .. و الله لهجة سعودية 100% ... ما تلاحظ عليه كلمة منقعه ...)

و بعدين نسبة السعوديين في السعودية اعتقد اكثر من 60% ... و هالشي واايد مساعد ..)

اعتقد انا الحين يبت لك مقارنه و كل شي وضح من خلالها ..)

في المؤتمرات الأوروبية .. كل وفد يتكلم بلعة بلده .. اذكر من فرنسي اتكلم إنجليزي بوجود الرئيس الفرنسي السابق .. و طلع من المؤتمر ..)

ناااس مهتمين بلغتهم .. فهتم فيهم العالم ...)

في العصر العباسي اللغة العربية كانت تُدرس في أوروبا .. و بالتحديد في الأندلس .. و كان شي طلاب علم من دول أوروبية ثانية .. لأنه اللغة العربي كانت قوية في العصر العباسي .. و من أسباب هالشي .. اي وااحد يكتب كتاب .. بعطوه وزن الكتاب ذهب .. يعني شي ناس تشجع على الكتابة .. و من بعد العصر العباسي .. اللغة العربية ضعيفة و كل ما يمضي الوقت .. تضعف اللغة ...)

والله لو الكل يقرأ القرآن بيستوي عالم في اللغة ... لكن حتى اللي يقرى القرآن يقراه بسرعة بدون تدبر .. اللهم يبا يختم و بس .. و أول آية نزلت على الرسول ( إقرأ ....) ...)

لكن للأسف ..... أمة إقرأ لا تقرأ ....)


و السمووحة عالإطالة ...)

[عيون امون]

والله خيو كل كلمه قلتها صح
بس بعد اللغه الانجليزيه صارت لغة العالم\
بس بعد صح ان المفروض نرمس بالعربي وي اي حد ايي بلادنا
ثانكس ع الطرح الفننننننننننننننتك وربي
والسموووووووووووحه

[●»[Mَя-Ąَِ]ٍَ«●]

اخوي السويدي. .

انت الحيـن بتكلم الهندي شرات فهمه . .

يعني هو يرمسك بهالطريقة و انت ترمسنه نفس الشي. عسب هو يفهم ..

و بخصوص الاجانب . . يعني اجنبي يا يسألك ., بترمسة عربي. .؟ اكيد لا

و من قالك نحن مب مجبورين نتعلم لغتهم . . لو السالفة . . شوف الدولة كم تخسر عسب نحن نتعلم الانجليزي .. و شوف الاهتمام اللي صاير عـ الانجليزي. .

و لو السالفة جي بعد جان ماشي عندنا حصص انجليزي . .و انت بروحك ساير المعهد التطبيقي و شايف . . و تعرف ان دراستهم اكثرها انجليزي. .

و الكل يعرف انه لـغة التواصل بيـن الناس . . يعني الغبر و جي . . لغة الانجليزي. .

الحيـن تسير اداوم اي مكان لازم انجليزي , , و حتى دراسة الجامعات لازم انجليزي. .

من قالك نحن مب فـ عصر التطور. . انت شوف بنفسك . . الاب اللي انت يالس عليه اجانب مخترعينه . .

النعال اللي تلبسة اجانب صانعينه . . نحن شو سوينا عسب هم يتعلمون لغتنا .

كل شي هم مسوينه . .

و مثل ما تشوف . . سكان الامارات كم عددهم . . ما وصلو مليون .. الهنود موصلين جريب مليونين .. !

و ماشاءالله بلادنا و الحمدلله في تطور و عمران و تشوف دبي كل بناية تنطح سحابة . .

نحن فالحيـن نطبق و ما نبتكر اشياء ..

و فـ هالزمن نحن مجبورين نتعلم انجليزي . . للدراسة ولا تواصل بين الناس و و . .و مب بس حق السفر و العمل. .

و السموحة .

[ولد & السويدي]

انا قلت تراني نتعلم اللغه ونستعملها بعملنا

لكن نستعملها في كل وقت لا والف لا اللي يبغي يستعملها دايما وجيه

يسير يغير جنسيته

هذي لغتنا الام ياجماعه هذي لغه القرآن

قلت لك يا اخوي انت قلت اذا يانا الهندي بنرمسه نفس طريقة فهمه

لكن اذا احنا سرنا بلادهم بيرمس نفس فهمنا

اقص رقبتي اذا رمس عربي

ليش؟
لأنهم مهتمين بهالشي

والاغلبيه من المواطنين جيه يتكلمون اجنجليزي وجيب واحد ديو انا بيعطي فلوس


مايصير هالشي


والسموحه

[أخاف الشووق]

اشكر فنك الشيييييييييييييييييييييييييييييييخ يبتهاااااا صح وربي لغتناااااااااا اختربت ع الآخر ابويه احيييينه صاااااااار يرمسنااااا منقع لان فالدوااااااااام وااااااااااااايد لغااااااااااااااااااااات ونحن لازم ننقض اللغة العربية=

[فارس الأحلام]

انت قلت (على قص رقبتي)
شو يعني ؟؟

ولله الكلام صج الناس قامو يطورن يتقلمون انجليزي احنا في عصر التطور والحرية مثل ماقالو فلمسرحية احنا في عصر التطور والحرية


وانا الصرااحه ماعرفت نتكلم انجليزي ولا ؟؟ حيروون العرب

[^^دموعي على خدي^^]

اولا" هذا الموضوع يديد علي



بس انا برمس ع نفسي ....انا لو ياني هندي برمسه هندي واذا انقلش برمسه انقلش واذ بنغالي ترى

[^^دموعي على خدي^^]

اولا" هذا الموضوع يديد علي



بس انا برمس ع نفسي ....انا لو ياني هندي برمسه هندي واذا انقلش برمسه انقلش واذ بنغالي ترى...........الخ
:yaw:



الصراحة الصراحة لغتي افتخر فيها ما اتنازل عنها بس في حال اني اضريت راح اتكلم ماعندي مشكله الواحد يتعلم ي الطيب........

[مروض الخيل]

مرحب مرحب
ماشا الله عليك احمد شاد حيلك
بعطيك مثال قوي
يوم تكون فالمركز اذا رحت لسوجي ولا برنس ولا غيرة وغيرة طبعا الجنسيات مختلفه
ما اظن في جنسيه غير الهنود طبعا
كييف ترمسه ؟؟؟
المهم ماعلينا خلنا ندخل وياك فصلب الموضوع
مب شرط اذا كان مسافر ولا مكان شغل
في سياح اييووون البلاد ونحن بلادنا وااايد تراثيه
والسياح اجانب اذا انته كنت دليل سياحي كيف بترمسهم
بالعربي مثلا لا طبعا
صح انته قلت لغه القرآن ومدري شو
آمنا بالله
انزين انته ما تبا ترمس
في ناس مجبورة انها ترمس
وبعديين وقت الموضوع ياا متاخر
انته الحينه ماشا الله بتسير تاني تنوي ادري تالت تنوي
ما تعلمت كلمه فالانجليزي ؟
شتقول عن الي فالجامعات والتقنيات والكليات
حليلهم يايبين لهم مدرسين من كندا وغيرها

السموحه عالتاخير
موضوعك قاااوي
والنقاش اقوى
سلمت وسلمت يمناك

تحياتي

[بنت دبا]

السلام على من اتبع خطاه الى يوم الدين
الصراحة انا بقول لك هي السالفة موسالفة خقة بس احنا نسير اماكن ما نكون نعرف مثلا نتكلم هندي بس الانجليزي الحين صاير عام بين كل البلدان واكثر الدول ما لها غنا عن اللغة الانجليزية يعني صارت اللغة الدارجة فشو باريك الاحسن اني اقعد اتكلم مع الشخص وهم مو فاهم عليا ولا انا فاهمة عليه ولا استخدم اللغة الانجليزية واريح راسي وفي مرات يكون الشخص هو الي طالب شيئ معين وما يعرف اللغة العربية ساعتها الصراحة الصراحة حسب النفسية يعني ممكن اقول له تكلم عربي على شان افهم انت شو تريد واحيانا افك راسي واكلمه انجليزي
وسلامتك:sheer:وسلامة الربع

[مجرد احساس]

هيه والله كلامك صدق
والله بس تعرفين هاليومين الكل ويا التطور
واللك لازم يقل شوفوني انا اعرف انجليزي
والله ناس فاضيه ولازم نفتخر بلهجتنا والله ما عليها كلام ترفع الراس :ax:

[اليماحي]

موضوعك موضع نقاش

لاكن مهما قلت ومهما زت ما اعتقد ايب شي يديد عن الي قالوه اخواني وخواتي الي سبقوني فـ الكلام

يسلمووووووو على طرحك لها الموضوع

تقبل مروووووري

[الحــايـرهـ]

كل اللي قلته صح بســـــــــــــــــ

نحن فعصر التطور

لغة الإنجليزية هي اللغة اللي نقدر نتفاهم مع اللي ما يعرف عربي ..

[ولد & السويدي]

انا اعترض على كلامج يا الحايره

صح ان نحن في عصر التطور

بس مب في عصر اهمال اللغه

تتفاهمون وقت شغلكم وسفركم انشاء الله بالهنديه

لكن يوم تكونون فالبلاد ويا واحد اجنبي يكلمج انجليزي لغير العمل

ردي عليه بالعربي وان مافهم يولي

ليش لما نحن نسير عندهم مايكلمونا بالعربي ولو يعرفو والله مايتكلمون

لين متا بتمون على هالحال


شكرا على رايج الحلو الحايره

وشكرا لجميع الاعضاء

[رقيقه الاحساس والمشاعر]

معاك حق وانا وحده من ظمنهم هههه اعترف خلاص باجر بنزل قرار

[شفا الجروح]

آلصرآحهـ موضووع حلوو ..

آنآ آلأصرآحهـ لمآ آتكلم وخآصهـ مع ربعي آتكلم عربي آنجليزي ..
{ آستهبآل لآآه .. هع هع

آلأمهم صدقت وآلله آنآ آحيآنآ آرمسهم آنجليزي وآحيآنآ
مآ آسوي سآلفهـ آرمس عربي فهم فهم مآ فهم بآلطقآق آلي يطقهـ ..
ينقع كآن يبى ليش نحن مآ يعآملونه شرآت مآ نعآملهم نحن فـ بلآدنآ
وآلله حآلهـ رمسهم آنجليزي سيروو نقعوو ..

وثآآنكس ع آلموضووع ...

[الدماني]

مشكور اخوي أحمد على الموضوع
بصراحة موضوع شيق
ما هم بس الى ايجبرون نتكلم الانجليزيه حتى بلادنا تجبراً على هدة اللغة
شوف أي إعلان ينزل في الجريدة عشان الوظائف أتكون اللغة الانجليزية شرط من شروط الوظيفة

السموحه اخوي أحمد :bt:

[شمؤخ إنسآنْ]

صدقت اخوي الكل هالايام يرمس نصه عربي والباجي انجليزي اونه خقه يسلمو عليك طرح

[ولد & السويدي]

ارجع واقول في حياتكم العاديه محد يجبركم تتكلمون انجليزي الا في العمل وبعض الدوائر

ولكن ان نحن ندخل كلمات انجليزيه او مهما كان على لهجتنا لغتنا لا

اللي ما عايبتنه اللغه او اللهجه يسير يغير جنسيته الا جنسيه اجنبيه


وشكرا على تفاعلكم

ويغلق الموضوع للصيانه خخخخ حلوه صح:h015:

[صاحـب الـسعـادة]

كلامك صح اخوي احمد

لواحد لا زم يلتزم بلغته

احنا يوم انسير بلادهم لازم شوي نعرف للغتهم

وهم ايو بلادنا وماعارفين شي لا كن شو نسوي

مانعرف

علعموم تسلم اخوي ع الموضوع المهم الي يستاهل النقاش

تحياتي ؛؛؛؛صاحب السعادة

[الفراق مكتوبلي]

تسلم عالموضوع
صح هوو جي ليش احنا الي نتنزل وانكلمهم بلغتهم بس هم اصلا يكرهونة احنا
ودينا كيف بيكلمونة
والعرب ما يفهمو
احنا منو انكلم اصلا محد بيسمعنة بس يارب موضوعك يتفاعل مع الناس

[شحيه والنعم]

بسم الله
صح كلام اخوي الحين يوم اتشوفون البنت يوم تتكلم نص عربي ونص انجليزي
نحن ما قلنا الوحدة لا تتكلم انجليزي بلعكس بس يوم تتكلم لشي ظروري مثلا في الدوام
بس يوم اتكلم وحدة مثلها عربيه مب داعي تتكلم انجليزي
وهذا رايي والسموحه